Në Gjermani ndalohen veglat e hackerëve

Ne muajin gusht 2007 në Gjermani hyri në fuqi ligji kontravers sipas të cilit ndalohet posedimi, shfrytëzim, prodhimi apo distribuimi i veglave të hackerëve, edhe pse nuk është e qartë në tërësi se cilat janë këto programe që bien në këtë kategori, sepse ky ligj nuk bën dallim mes atyre që i shfrytzojnë veglat e tilla për qasje të paautorizuar në kompjuterë të huaj dhe administratorëve të cilët kryesisht i përdorin për qëllime testim të sigurisë apo ngarkesës së rrjeteve të tyre.

Ky ligj, i cili duket sikur të jetë aprovuar në kohërat e kaluara, mban shenjën zyrtare si paragrafi 202c dhe parasheh dënime me burgim deri 10 vjet për ata që nuk e respektojnë në më shumë raste. Përveç shfrytëzimit të programeve si nmap ose nessus ("kriminelët" të cilët i shfrytëzojnë mund të dënohen me deri 12 muaj burgim dhe gjobë me të holla), me këtë ligj ndalohen edhe sulmet DoS dhe qasja e paautorizuar në kompjuterë dhe të dhëna. Hackerët gjermanë mbetën të habitur dhe të shokuar nga hyrja në fuqi e këtij ligji, përkundër ankesave të shumta nga ana e tyre gjatë një viti. Nga grupi i hackerëve gjermanë Chaos Computer Club thanë që politikanët gjermanë me siguri mendojnë që me sjelljen e këtij ligji e kanë liruar shtetin e tyre nga të gjitha problemet lidhur me sigurinë kompjuterike. Programerët e mbledhur rreth veglës KisMAC për Mac OS X, e cila është e dedikuar për gjetjen e rrjeteve pa tela të pambrojtura, kanë paralajmëruar shpërngulje në Holandë. Shpërngulje ka paralajmëruar edhe grupi i hackerëve Phenoelit si dhe disa grupe tjera programuese hakerësh. Kohë më parë një ligj i tillë ishte propozuar edhe në Britani të Madhe, por atje ishte hedhur poshtë për shkak të presionit të madh të IT industrisë. Në Gjermani, si duket, liritë e individëve konsiderohen kërcënim për shtetin ligjor, në vend se të jenë arsye e ekzsitimit të tij, siç ndodh rëndom në demokracitë e vërteta.