Real Madrid mposht Barcelonën në El Clasico

Real Madrid mposht Barcelonën në El Clasico


Reali i Madridit ka dalë fitues në derbin më të madh të sezonit në La Liga, atë përballë Barcelonës. Goli i vetëm në këtë El Clasico të parë të sezonit, u shënua nga braziliani Julio Baptista.

Fitorja e zgjeron diferencën e kryesimit të Realit ndaj Barcelonës në La Liga, nga katër në shtatë pikë. Me gjithë mungesën e Lionel Messi, Barcelona filloi ndeshjen fuqishëm duke synuar ruajtjen e rekordit 100% të fitoreve në shtëpi të vet, por Iker Casillas qëndroi i pamposhtur në tentimet e ekipit vendas.

Julio Baptista ishte heroi i Realit, kur në minutën e 36-të të ndeshjes, pas një shkëmbimi të dyfishtë të topit me Ruud van Nistelrooyn, shënoi një gol mjaft të bukur, të vetmin e ndeshjes.

Ronaldinho së bashku me Eto’o, që u renditën në sulmin e Barcelonës, nuk arritën të çajnë portën e mysafirëve, ndërsa edhe Dos Santos dhe Bojan Krkic, që u kyçën në fundin e pjesës së dytë, nuk treguan ndonjë ndikim për të shmangur humbjen.